Ruth Vang
| Ruth Vang | |
|---|---|
| Forkvinna í Framsókn | |
| Núverandi | |
| Tók við starvinum 6. mars 2020 | |
| Undanmaður | Poul Michelsen |
| Landsstýriskvinna í fíggjarmálum | |
| Í embæti 22. desember 2022 – 13. apríl 2026 | |
| Undanmaður | Uni Rasmussen |
| Eftirmaður | Aksel V. Johannesen |
| Løgtingslimur | |
| Núverandi | |
| Tók við starvinum 31. august 2019 | |
| Persónlig kunning | |
| Fødd(ur) | 5. apríl 1966 Tórshavn, Faroe Islands |
| Politiskur flokkur | Framsókn |
Ruth Vang (fødd 5. apríl 1966)[1] er ein føroysk ljósmóðir, bankakvinna og politikari fyri Framsókn.[2] Síðan mars 2020 er hon forkvinna fyri Framsókn.[3] Hon var landssýriskvinna í fíggjarmálum frá desember 2022 til apríl 2026.
Bakgrund
[rætta | rætta wikitekst]Ruth Vang býr í Havn. Hon er útbúgvin ljóðmóðir frá Danmarks Jordemoderskole í Keypmannahavn í 1992 og starvaðist sum ljósmóðir á Landssjúkrahúsinum 1992-99, og sum leiðandi ljósmóðir 1999-2005.[4] Meðan hon var í starvi sum ljósmóðir las hon HD í roknskapi og fíggjarstýring á Aarhus Handelsskole frá 2001 til 2005 og broytti síðan yrkisleið til fíggjarheimin. Frá 2005-11 var hon fíggjarráðgevi í Eik Banka. Síðan 1. januar 2013 hevur hon verið í starvi sum deildarleiðari í Tórshavnar kommunu.[5] men er í farloyvi, meðan hon er í Løgtinginum.
Politisk lívsleið
[rætta | rætta wikitekst]Ruth Vang stillaði upp til Løgtingsvalið 2015 uttan at verða vald, men eftir at landsstýrið varð skipað og flokkur hennara kom í samgongu, tók hon sæti í løgtinginum sum avloysari fyri formannin í Framsókn, Poul Michelsen, tá ið hann varð valdur til vinnu- og uttanríkismálaráðharri í stjórnini hjá Aksel V. Johannesen. Framsókn telvaði seg til formanssessin í Fíggjarnevndini, tá ið nevndarsessirnir vóru býttir. Júst tá var Annika Olsen, ið varð vald fyri Fólkaflokkin, farin úr Fólkaflokkinum og blivin limur í Framsókn, og Sonja Jógvansdóttir, ið varð vald fyri Javnaðarflokkin, fór úr flokkinum og gjørdist leysgangari,[6] og harvið misti samgongan meirlutan. Tá ið Annika Olsen gjørdist limur í Framsókn fekk samgongan aftur meirluta, og Annika fekk formanssessin í Fíggjarnevndini, men eftir stórt trýst, valdi hon at fara úr aftur Framsókn og gerast leysgangari og segði eisini formanssessin í Fíggjarnevndini frá sær, og samgongan kom aftur í minniluta, men Sonja Jógvansdóttir lovaði at stuðla samgonguni, hóast hon var leysgangari. Ruth Vang gjørdist síðan forkvinna í Fíggjarnevndini.[7]
Hon varð ikki afturvald á løgtingsvalinum í 2019, men tá ið Poul Michelsen gavst í politikki hin 6. mars 2020, tók hon aftur sæti á Løgtingi og gjørdist forkvinna í Framsókn. Á løgtingsvalinum í 2022 varð Ruth vald í Løgtingið við 981 atkvøðum. Framsókn fekk tríggjar limir valdar, og flokkurin kom í lyklastøðu, tá ið samgonga skuldi skipast. Hin 22. desember 2022 varð Ruth vald til landsstýriskvinnu í fíggjarmálum.[8]Hon røkti landsstýrisessin fram til 26. mars 2026, tá ið Aksel V. Johannesen, løgmaður, útskrivaði nýval vegna ósemju millum samgonguflokkarnar um at hækka pensjónsaldurin. Hon varð síðan afturvald við 991 persónligum atkvøðum.
Løgtingsnevndir
[rætta | rætta wikitekst]- 2015-2019 Forkvinna í Løgtingsins fíggjarnevnd[9]
Familja
[rætta | rætta wikitekst]Hon er dóttir Ester og Petur Danielsen og er gift med Dánjal Vang. Tey eiga trý børn: Ester, Petur Kristinn og Hanna.
Keldur
[rætta | rætta wikitekst]- ↑ logting.fo - Ruth Vang
- ↑ "Framsokn.fo - Ruth Vang". Talgilda eintakið, gjørt eftir tí talgilda frumeintakinum , varð goymt í skjalasavni á netinum tann 2015-09-25. https://web.archive.org/web/20150925123351/http://www.framsokn.fo/ruth+vang_ubdj.html. Heintað 2015-12-18.
- ↑ "Ruth Vang tók við sum forkvinna í Framsókn 6. mars 2020, eftir at Poul Michelsen segði frá sær tingsess og formanssessin fyri sjúku." Ruth Vang, framsokn.fo
- ↑ linkedin.com - Ruth Vang
- ↑ Torshavn.fo - Nýggjur leiðari á Barna- og ungdómsdeildini, publiceret den 27. nov. 2012.
- ↑ kvf.fo - Sonja J. Jógvansdóttir farin úr Javnaðarflokkinum
- ↑ kvf.fo - Annika Olsen forkvinna í Fíggjarnevndini
- ↑ Samuelsen, Ingi (22. desember 2022). "Hesi manna nýggja landsstýrið". Portal.fo. https://in.fo/news-detail/nogv-bendir-a-niggju-folk-i-landsstyrinum.
- ↑ Portal.fo - Ruth Vang forkvinna í fíggjarnevndini, skrivað hevur Steinar Patursson 30.09.2015 - 11:53
