Johan Dahl

Johan Dahl
Landsstýrismaður í vinnumálum
Í embæti 26. september 2008 – 15. september 2015
Undanmaður	Bjørt Samuelsen
Eftirmaður	Poul Michelsen
Landsstýrismaður í fiskivinnumálum
Í embæti 3. februar 2004 – 23. februar 2004
Undanmaður	Jacob Vestergaard
Eftirmaður	Bjørn Kalsø
Í embæti 4. mai 2011 – 23. november 2011
Undanmaður	Jacob Vestergaard
Eftirmaður	Jákup Mikkelsen
Løgtingsformaður
Núverandi
Tók við starvinum 13. apríl 2026
Undanmaður	Bjørt Samuelsen
Løgtingsmaður
Í embæti 30. apríl 2002 – 1. september 2015
Núverandi
Tók við starvinum 31. august 2019
Persónlig kunning
Fødd(ur)	Johan Dahl (1959-09-19) september 19, 1959
Politiskur flokkur	Sambandsflokkurin
Útbúgving	Bankamaður

Johan Dahl (føddur 19. september 1959) er føroyskur politikari og vinnulívsmaður. Hann er uppvaksin í Fámjin, hann er sonur Jógvan Dahl, sála, úr Vági og Ebbu, fødd Albinus, sála, úr Fámjin. Hann er giftur við Lindu Herdalur. Johan hevur verið landsstýrismaður í Vinnumálum frá 2008 til 2015. Hann hevur eisini verið næstformaður Sambandsflokksins og løgtingsformaður.

Hann hevur bankaútbúgving og ávís prógv innan merconom. Sum ungur arbeiddi hann í Sjóvinnubankanum, og í 1982 gjørdist hann stjóri í Vágs Skipasmiðju, sum A/S J. Dahl átti. Johan er eftirkomari hjá Dahl familjuni í Vági, sum stovnaðu fyritøkuna á Gørðunum. Hann var stjóri har til 1990. Síðan var hann stjóri í World Seafood frá 1991 til 1992, stjóri í Sp/f Faromar frá 1997, stjóri í Faroe Coldstores frá 1998, stjóri á Kollafjørð Pelagic og stjóri fyri frystigoymsluna Kloosterboer Terminal Faroe Islands í Kollafirði. Hann var stýrislimur í Føroya Arbeiðsgevarafelag frá 1982 til 1990 og stýrisformaður í Seamark Scandinavia A/S frá 2004 til 2007.

Johan Dahl varð valdur inn á Føroya Løgting í 2002 og hevur sum løgtingslimur verið limur í Vinnunevndini frá 2002 til 2006, limur í Fíggjarnevndini frá 2002 til 2004.

Hann varð afturvaldur á løgtingsvalinum í 2004 við 245 persónligum atkvøðum. Hann var formaður í Uttanríkisnevndini frá 2004 til 2008, umframt næstformaður frá 2004 til 2006, og formaður í Vinnunevndini frá 2006 til 2008. Johan Dahl varð útnevndur til fiskimálaráðharra í fyrstu stjórnini hjá Jóannes Ejdesgaard tann 3. februar 2004, men varð koyrdur frá longu 23. februar, eftir at nógv hevði verið frammi í føroysku fjølmiðlunum um ymiskt úr hansara fortíð.

Á løgtingsvalinum í 2008 varð hann afturvaldur við 377 persónligum atkvøðum. Hann varð útnevndur til vinnumálaráðharri og røkti landsstýrisessin frá 26. september 2008 til 15. september 2015. Harumframt var hann virkandi fiskimálaráðharri frá 4. mai til 14. november 2011.

Hann stillaði ikki upp aftur á løgtingsvalinum í 2015 og gavst tá fyribils í politikki. Hann stillaði upp aftur á løgtingsvalinum í 2019 og varð afturvaldur við 276 persónligum atkvøðum. Á løgtingsvalinum í 2022 varð hann afturvaldur við 502 persónligum atkvøðum, sum er hansara besta persónliga valúrslit nakrantíð.

Hann varð afturvaldur á løgtingsvalinum í 2026 við 346 persónligum atkvøðum. Eftir at stjórn varð skipað millum Fólkaflokkin, Sambandsflokkin og Javnaðarflokkin, gjørdist hann løgtingsformaður.

Slóðir úteftir

• Johandahl.net Archived 2011-10-07 at the Wayback Machine
• Samband.fo