Vága Floghavn
Vága Floghavn er einasti flogvøllur í Føroyum. Flogfar flýgur hvønn dag ímillum Føroyar og útlondini.
[rætta] Søgan
Vága Floghavn er upprunaliga hernaðarfloghavn bygd undir Seinna heimsstríði. Fyrst í sekstiárunum gjørdist tørvurin á flogferðslu til Føroyar so mikið stórur, at farið varð undir at nútímansgera floghavnina við m.ø. hentleikum til ferðafólk. 1. juli 1963 lat floghavnin upp fyri vanligari flogferðslu, og fyrsta flogfarið eftir hetta lendi 17. juli. Fyrstu tíðina vóru einans skrúvuflogfør nýtt. Síðani 1977 hava eisini nýmótans jettflogfør røkt rutusambandið til floghavnina.
Atlantsflog fór í 1988 at flúgva millum Danmarkar og Føroya. Fyrstu tíðina átti danskt felag í flogfelagnum. Seinni gjørdist tað føroyskt burturav og flýgur nú eisini til t.d. Noregs, Skotlands, London og Reykjavíkar.
Statens Luftfartsvæsen hevði umsitingina av floghavnini um hendi frá 1963 til 30. apríl 2007. 1. mai 2007 yvirtók Føroya Landsstýri Vága Floghavn. Frá sama degi er floghavnin landsstovnur undir Vinnumálaráðnum.
