Ólavur Jøkladal

Ólavur Jøkladal
er eitt	menniskja
Fødd(ur)	20. sep 1952 í/á Klaksvík
Starv	tónaskald, sangari, náttúruvísindafólk, kórleiðari
Dátuheiti
Commons	Ólavur Jøkladal

Ólavur Jøkladal (føddur 20. september 1952 í Klaksvík), er ein føroyskur kórleiðari, tónaskald, tónleikafrøðingur, málfrøðingur og vinnulívsmaður, sum í løtuni starvast sum fulltrúi í Fólkaheilsuráðnum. Hann var skrivstovustjóri í Reiðarafelagnum frá 2006-08, hann tók við eftir Jógvan Norðbúð sála. Í juni 2020 varð hann tilnevndur nevndarlimur í Dansk færøsk kulturfond. Í oktober 2020 varð hann valdur sum formaður fyri Leiklistaráðið, ið virkar sum stýri fyri Tjóðpalli Føroya.

Ólavur Jøkladal hevur verið sera virkin innan tónleik, serliga kórtónleik og hevur m.a. komponerað fýra tónleikaverk og stjórnað fleiri kórum. Í 1987 útgóvu Havnarkórið og Tórshavnar Kamarkór Blátt og í 1996 útgav Tórshavnar Kamarkór Várlongsil. Jøkladal stjórnaði kórunum og eigur tvey av løgunum á útgávuni Várlongsil.

Lívsleið

Útbúgvingar og størv

Ólavur Jøkladal er útbúgvin merkonom frá Føroya Handilsskúla í 1974. Í 1980 byrjaði hann at lesa tónleikavísindi á Lærda Háskúlanum í Keypmannahavn (Københavns Universitet). Hann fekk prógv sum cand. phil í 1988 og cand. mag. í 1992 á Lærda Háskúlanum í Keypmannahavn og Fróðskaparsetri Føroya í tónleikavísindum og norurlendskum máli.

Hann hevur starvast innan ymisk øki. Frá apríl 2006 til juli 2008 var hann skrivstovustjóri í Føroya Reiðarafelag.

Ólavur er giftur Ásu av Reyni Jøkladal, ið er dóttur kenda listarmannin ingálv av Reyni, tey eiga trý børn.

Yrkisleið innan tónleik

Síðan 1995 hevur hann verið kórleiðari hjá kamarkórinum Aurora Borealis, sum varð sett á stovn sama ár. Hann var leiðari hjá Ebenezerkórinum frá 1984 til 2000.

Ólavur Jøkladal stovnaði Tórshavnar Kamarkór í 1985, og hann stjórnaði eisini kórinum næstu tíggju árini. Kórið var byrjað í 1984 undir navninum Kamarkór Tórshavnar Musikkskúla, hetta var broytt til Tórshavnar Kamarkór árið eftir. Síðan 2014 hevur hann verið organistur í Føroysku Fólkakirkjuni, í løtuni organistur í Hoyvíkar kirkju.

Hýsisá - tónamynd um Mikkjal á Ryggi

Í 2010 og 2011 varð ein leikur framførdur um Mikkjal á Ryggi í húsunum í Beitinum. Leikurin var 45 minuttir við einmansleikaranum Hans Tórgarð. Ólavur Jøkladal skrivaði tónleikin til leikin hjá Mikkjal á Ryggi. Hann komponeraði overturuna, sum er forspælið til leikin, ið er bert fyri ljóðføri. Harumframt hevði Ólavur gjørt millumspøl og løg til yrkingar eftir Mikkjal á Ryggi, eitt nú: "Steinstólpan" og "Vatnið vinnur harðar hellur". Hans Tórgarð hevði leiklutin sum Mikkjal, og 14 tónleikarar og sangarar undir leiðslu av Ólavi Jøkladal framførdu tónleikin í samspæli við leikaran.

Verk

• 1985 Sálmur 42
• 1995 Innibyrgdur
• 2010 Overtura - Hýsisá - Einmansleikur framførdur til minnis um skaldið Mikkjal á Ryggi, leiktur av Hans Tórgarð, tónleikur til yrkingar eftir Mikkjal á Ryggi, Ólavur Jøkladal komponeraði tónleikin.
• 2011 Kvintett “Corvus”

Útgávur

• 1987 Blátt - Havnarkórið & Tórshavnar Kamarkór, útgivið sum grammofonpláta og CD
• 1996 Várlongsil - Tórshavnar Kamarkór, útgivið av Tutl sum CD

Framførslur

• 1984 Christianskirkjan, Klaksvík
• 1986 Tivolis konserthøll, Keypmannahavn
• 1986 Roskilde Domkirke
• 1987 Felagskórið á Ólasøku á Tinghúsvøllinum
• 1993 Sofia Albertina, Landskrona
• 1993 Lunds Domkirke
• 1996 Hallgrímskirkjan, Reykjavík
• 1997 Gammel Aker kirke, Oslo
• 1997 Viborg Domkirke
• 2001 Konsert á ráðstevnu hjá Nordisk Musikpædagogisk Union
• 2011 Havnar Kirkja, dómkirkjan í Tórshavn
• 2015 framførsla fyri ambassadørum - Danska Uttanríkisráðið
• 2015 30 ára jubileumskonsert, Vesturkirkjuni
• 2016 Felagskórið á Ólasøku á Tinghúsvøllinum

Álitisstørv

• Útbúgvinarráðið: 2007 – Nevndarumboð Reiðarafelagsins í Maritima Útbúgvingarráðnum.
• Arbeiðsmarknaðarráðið: 2006 – 2007 Nevndarumboð Reiðarafelagsins í Arbeiðsmarknaðarráðnum.
• Samstarvsráðið: 2006 – 2007 Nevndarumboð Reiðarafelagsins í Samstarvsráðnum fyri trygd á sjónum.
• Hjálpargrunnurin fyri óarbeiðsførar fiskimenn: 2007 – Nevndarumboð fyri Føroya Reiðarafelag
• Dansk færøsk kulturfond: nevndarlimur í Dansk færøsk kulturfond frá juni 2020 og seks ár fram.
• Leiklistaráðið: Formaður í Leiklistaráðnum frá oktober 2020 og trý ár fram.

Norðurlendskt samstarv

• 1985-2001 stjórnarlimur í NMPU (Nordisk Musikkpedagogisk Union) og 5 ár sum formaður fyri NMPU-Føroyar.
• 1993-1994 Fyrilisið á Kénnaraháskóla Íslands um føroyskt og íslendskt mál. Greitt frá føroyskum viðurskiftum á "Mitt høgskolan" í Østersund, Ørnskjoldsvik og Sundsval í Svøríki.
• 1994-1999 Ólavur Jøkladal hevur verið í norðurlendskum samstarvi innan bókmentir. Samstarvandi londini vóru Noregi, Ísland, Grønland, Estland og Føroyar. Samstarvið var skipað undir Nordisk Ministerråd. Jøkladal umboðaði Føroyar á ráðstevnum í Hamar, Nuuk og í Tallin.

Heiður

• 2023 - Heiðurstekin Tórshavnar Býráðs fyri hansara slóðbrótandi virksemi innan tónleik.