Hernaðarliga verjan

Frá Wikipedia, hin frælsa alfrøðin
F16 kann flúgva skjótari enn ljóðið, eisini tá ið tað loypur á. Tað kann eisini søkja at málum á jørð ella á sjónum at hjálpa hinum verjueindunum.

Hernaðarliga verjan skal við vápnum loysa hernaðarligar uppgávur. Hernaðarliga verjan er í trimum deildum: herurin, loftverjan og sjóverjan. Harumframt er eisini t.d. heimaverja. Hernaðarliga verjan er undir verjumálaráðharranum og verjumálaráðnum. Ovasta hernaðarliga stýrið er verjuovastin og verjuyvirmannaráðið. Øll lond hava sína landsverju at verja seg fyri ágangi uttaneftir. Eisini hernaðarliga eru Føroyar partir í danska ríkinum, so í verjuni hava vit ikki so nógv at siga. Vit hava ikki føroyska landsverju, men Vaktar- og Bjargingartænastan og vaktarskip hennara verja t.d. fiskiøki okkara fyri ránsveiðu. Tey, ið starvast í landsverjuni, eru fólk í føstum starvi og verjuskyldug. Ovastarnir hava sersjantar undir sær. Nógv fólk við vanligari útbúgving eru eisini í føstum hernaðarligum starvi. Undirhermenn í føstum starvi, kostáplar, hava um hendir serliga ta dýru útgerðina. Tey verjuskyldugu verða innkallað og útbúgvin. Summi av teimum innkallaðu verða eykaovastar og sersjantar. Almenna fyrireikingin skal síggja til, at samfelagið er til reiðar til kríggj, og at útgerð fæst til vega. Tíðindi skulu verða send ótarnað og skjótt, og ósonn tíðindi ikki koma út í orð og loypa ótta á fólk. At fólkið er róligt og vil varðveita samfelagið, er grundarlagið undir verjuni. Almenna verjan bjargar eisini mannalívum og ognum. Hon hjálpir fólki úr vanda, sløkkir eldar, o.a.

Herurin arbeiðir á landi. Hermenninir eru í grønum og døkkum eyðkennisbúnum. Herurin hevur ymiskar eindir. Stríðshermenn og gonguhermenn (infanteristar) eru saman við stríðsvognunum í sjálvum bardaganum. Skotherdeildirnar, artillari, skjóta við kanónum. Verkfrøðingar byggja vegir, forðingar, brýr og støðir. Útgerðarliðini fáa útgerð til hermótini og taka særdar aftur við sær.

Sjóverjan verjir sjóøkið. Fólkið er í myrkabláum eyðkennisbúna. Sjóverjan nýtir skip. Á skipunum eru t.d. rakettir. Korvettirnar eru so stórar, at tær sigla í øllum veðri. Torpedobátar eru smáir og ganga skjótt. Kavbátar kunnu sigla niðri í sjónum. Minuleggjarar og minustrúkarar leggja og taka upp minur. Verjuskipini ansa eftir sjóøkinum. Tey eru eisini undir Grønlandi og Føroyum.

Flogvápnið verjir loftrúmið og hjálpir hinum verjueindunum. Fólkið er í ljósabláum eyðkennisbúna. Ymisk flogfør eru. Stríðsflogfør ella tyrlur flyta útgerð og fólk. Tyrlurnar verða eisini brúktar í bjargingartænastuni. Á jørðini hevur flogvápnið rakettir, sum kunnu skjóta flogfør niður.

Heimaverjan gongur hinum verjueindunum til handa við løttum, men týðandi uppgávum. Nøkur fá teirra hava fast starv. Flestu eru sjálvboðin, sum í frítíðini fáa stutta útbúgving, og sum kunnu møta við stuttum skotbrái.

Lond[rætta | rætta wikitekst]

HDMS Absalon (L16) er eitt av teimum stóru skipunum í danska flotanum. Við rakettunum hevur hon stóra megi.
Gonguherlið við kanón at verja seg fyri stríðsvognum. Kanónin kann skjóta stríðsvognar í smildur.
Land Árlig mett fíggjarætlan
(milliardir USD)
Kjarnorkuvápn Herfólk í 2013
USA USA 682 7,700 1,369,532
Fólkalýðveldið Kina Fólkalýðveldið Kina 166 240 2,285,000
Russland Russland 94 8,500 766,000
Stóra Bretland Stóra Bretland 63 225 198,810
Frakland Frakland 62 300 222,215
Japan Japan 51 - 247,764
Týskland Týskland 49 - 182,620
India India 43 90-100 1,325,000
Suðurkorea Suðurkorea 41 - 655,000
Saudi Arabia Saudiarabia 40 - 233,500
Italia Italia 40 - 179,155
Brasil Brasil 27 - 318,480
Avstralia Avstralia 27 - 56,552
Spania Spania 25 - 123,300
Turkaland Turkaland 25 - 664,049
Kanada Kanada 21 - 65,700
Taivan Teivan 19 - 290,000
Irak Irak 18 - 271,400
Ísrael Ísrael 16 50 176,500
Niðurlond Niðurlond 13 - 37,365
Noreg Noreg 6 - 24,450
Danmark Danmark 3 - 18,628
Wikimedia Commons logo
Wikimedia Commons logo
Sí miðlasavnið