Loðpílur
Loðpílur (Salix lanata) er ein lágvaksin, leyvfellandi runnur av pílafamiljuni. Hann er eyðkendur við sínum hvílodnu bløðum á báðum síðum. Loðpílur blómar tíðliga, fyri leyvskot á vári. Hann er einkyndur, hann- og honplantur hvør sær. Blómurnar eru langir, ljósagulir reklar. Loðpílur er stundum krúpandi, stundum upprættur har hann fær frið, upp til 1,5 - 2 m. hædd.
Upprunaøki: Loðpílur finst í Norður-Europa og Norður-Asia, frá Íslandi heilt eystur til Siberia, men vegna seyðabit er hann nú sjáldsamur í Føroyum og Skotlandi. Eitt undirslag, Salix lanata richardsonii finst í Norður-Amerika men hvørki hesin ella Salix lanata finst í Grønlandi.
Loðpílur í Føroyum: Nú er loðpílur bert funnin í tveimum støðum i Føroyum, í Streymoy og Borðoy, men talið av plantum í hesum støðum, óatkomuligt fyri seyði, ber boð um at hann hevur verið vanligur vøkstur, áðrenn seyður kom til landið. Føroyski loðpílurin er ein krúpandi runnur, hvørs greinar liggja 1 til 2 metur fram eftir jørð, fyri síðani at benda teir síðstu 20-30 sentimetrarnar upp í loft; og bløðini her gerast ikki so loðin sum aðrastaðni, t.d. í Noregi.
