Gunhild kongamóðir

Gunhild kongamóðir, helst dóttir danska kongin Gorm Gamla, var gift við norska konginum Eiriki Blóðøks og mamma kongin Harald Gráfeld.

Gunhild kongamóðir (uml. 910 - uml. 980) var drotning í Noregi. Hon giftist við norska konginum Eiriki Blóðøks o.u. 920, og tá ið hann var burturrikin av Hákuni Aðalsteinsfostra, fylgdi hon honum til Onglands og Orknoyar; nakað seinni doyði Eirikur á víkingaferð. Tá ráddi í Danmark Haraldur Blátonn. Gunhild fór við synum sínum til hansara, og hann knæsetti ein son hennara, Harald, sum seinni var kallaður Gráfeldur eftir tí gráu loðskinskápuni, hann leingi gekk í. Haraldur Blátonn styðjaði Gunhild og synir hennara í teirra roynd at vinna Noreg aftur. Hetta eydnaðist teimum o.u. 960, og teir skuldu so vera undirkongar danakongs í Noreg. Teir brendu inni Sjúrð jall á Lað í Tróndheimi og royndu at gera seg fríar av danaveldi. Hákun Sjúrðason, seinni Hákun jall, leitaði sær hjálp hjá Haraldi Blátonn. Hann lokkaði Harald Gráfeld til Danmark, læt hann drepa, rak Gunhild og synir hennara burtur úr Noreg og setti Hákun jall at stýra Noreg norðan og vestanfjalla.