Grýlan (sjónleikur)

Stuttsøgan Grýlan hjá William Heinesen, varð í februar 2005 sett upp sum leikur í Sjónleikarhúsinum í Havn. Tað er leikbólkurin Willieboys, sum setti leikin upp.

Willieboys

• Bárður Persson, stigtakari, týðari, samskipari og leikari.
• Finnur Jensen, leikari.
• Kjartan Hansen, leikari.
• Gunnvá Zachariassen, leiksstjóri.

Søgugongdin í stuttsøguni og leikinum

Grýlan er um fornan føstugangssið í Føroyum, og er at finna í savninum Himinin Brosar hjá William Heinesen. Christian Matras týddi søgurnar til føroyskt. Í Svínoy helt hesin siður sær heilt til 1956. Poengið í Grýluni er í stuttum, at hon skal tryggja lív, gróður og ávøkst. Tað ger Grýlan við at signa grøðina, djór og menniskju við Standara sínum (t.e. manligi kynslimurin). Men sum vera man hevur maðurin, sum á hvørjum ári letur seg í sum grýla, svárar trupulleikar av at sameina henda forna, heidna sið við sína kristnu trúgv. Og tað er júst hesin tvídráttur, ið skapar stóra spenningin í søguni.