Lutheranisma
Lutheranisman (lutherdómur) er ein kristin trúgv, sum er ein grein av protestantismuni. Lutheranisman er størsti trúarbólkur í Skandinavia, Týsklandi og Dakota í USA og er høvuðstrúgvin í m.a. Svøríki, Noregi, Íslandi og Finnlandi. Fólkakirkjan í Føroyum er eisini evangelisk-luthersk. Lutheranisma byggir á læru Martin Luther. Hann innførdi hesa nýggju læru tíðliga í 16. øld í Týsk-rómverska ríkinum, talan var um eina endurnýggjan og broyting av tí katólsku trúnni. Evangelisk-lutherska trúgvin breiddi seg til fleiri lond í 16. øld, og varð hetta tíðarskeiði seinni nevnt Reformasjónin. Tað eru fleiri ymiskir trúarbólkar innan kristindómin, og er Luteranisman ein teirra. Av teimum umleið 2 milliardir kristnu í heiminum eru umleið 70 milliónir av teimum lutheranarar.
Lutherrósan var persónliga innsiglið hjá Martini Luther og kemur fyrstu ferð fyri á einum brævi frá 1517. Eftir hvat ið skilst teknaði Luther sjálvur rósuna. Svarti krossurin í reyða hjartanum ímyndar treytaleysu trúnna á tann krossfesta Krist og kærleikan í boðskapinum. Hvíta rósan ímyndar gleðina, troystina og friðin í trúnni. Bláa bakgrundin er ein sinnismynd av andaligu og trúarligu vónini um himmalska gleði, sum, sambært Luther, byrjar longu her á foldum. Gylti ringurin, ið kransar bláa litin, boðar, at himmalska gleðin varir í allar ævir og er dýrbærari enn aðrar gleðir og aðrir ágóðar.
