Jóhan Hendrik Winther Poulsen

Johan Hendrik Winther Poulsen (20. juni 1934 í Sumba) er ein føroyskur málfrøðingur. Jóhan Hendrik Winther Poulsen (føddur 20.06.1934 í Sumba í Suðrið). Jóhan Hendrik Winther Poulsen er víða gitin fyri at verða professari í norðurlendskum, og serliga føroyskum máli á Fróðskaparsetri Føroya. Hann var við til at savna tilfar til føroysku orðabókina, millum annað við at hava sendingina Orðabókin, har fólk kundu skriva inn orð, ið tey nýttu til føroysku orðabókina, og er tí ofta róptur Orðabókin.

Familja hansara

Sum lítil búði Jóhan Hendrik heima í Skopun, saman við foreldrunum Kristionnu (fødd Mikkelsen, av Tvøroyri) og Niels Winther Poulsen, og yngri brøðrunum Mortani og Halgir. Hann giftist við Birnu Patursson í 1964 í Havnar Kirkju. Tey eiga børnini Hjørt, Hjørdis, Teit og Ingibjørg. Í dag búgva Jóhan Hendrik og Birna heima í Kirkjubø, har tey hava búð síðan í 1969. Jóhan Hendrik súkklaði eisini nógv, onkuntíð hevur hann verið í Íslandi á súkklu, og gjøgnum Ongland, Týskland, Frankríki og Danmørk við soninum Teiti. Hann súkklaði til arbeiðis hvønn morgun á sínum heldur ungu døgum, og svam nógv í sjónum.

Lestrar – og arbeiðstíð hansara

Barnaárini gekk Jóhan Hendrik í skúla í Skopun. Seinni í 1948 fór hann til havnar í skúla, og leyk studentaprógv í 1952. Síðani fór hann á lærda háskúla í Keypmannahavn, har hann las latín og enskt, og fór síðan í staðin at lesa norrøna málfrøði. Hann tók mag.art. prógv í 1966. Hann las á lærda háskúlanum í Reykjavík í 1960-62, og eftir tí próvtøkuna arbeiddi hann í Keypmannahavn á Árnasavni, við ta norrønu orðabókina. Í 1967-68 fluttu hann og Birna Sjúrðardóttir Patursson (kona hansara), til Illinois í USA, við børnunum Hjørdis og Teiti, at arbeiða sum lærari í fornnorrønum og norðurlendskum málum á lærdum háskúla í Illinois. Síðani seinni í 1968 arbeiddi hann leysløntur á Føroyamálsdeildini, har hann í 1972 varð settur í starv sum deildarstjóri, og seinni bleiv lektari. Tað var í 1986 at Jóhan Hendrik varð tilnevndur professari í norðurlendskum, serliga føroyskum máli á Fróðskaparsetri Føroyra, av Atla Dam løgmanni. 1.september 1997 loysti hann við umsókn úr starvi við eftirløn.

Bøkur

Í 1969 fór Jóhan Hendrik undir eina sending, nevnd Orðabókin. Tað var fyri at samla inn orð, ið lítið var vitað um. Henda útvarpssending, varð væl umtókt, og nógv sendu inn nógv orð við postinum. Tað mesta av hesum tilfari, var við í Føroyska Orðabók, ið hann var aðalstjóri á. Hon kom út 24.juli í 1998. Eisini hjálpti hann Christian Matras við útgávuni av Føroyskari-danskari orðabók, ið kom út í 1961 í 2. útgávu.

Bókin Mál í Mæti, er eitt greinasavn eftir sjálvum Jóhan Hendrik. Hon var útgivin í sambandi við 70 ára føðingardag hansara, 20.juni 2004. Soleiðis varð sagt um heitið á bókini: “Mál í mæti er valt sum heiti á hesi bók við tí í huga, at Jóhan Hendrik nýtir og viðger móðurmálið við virðing og sóma – bæði í talu og skrift – hann gongur á odda og stimbrar onnur at fjálga um tað, tí hjartamál hansara er av sonnum málið.” Ritstjórar á bókini, eru Anfinnur Johansen og Hans Joensen.

Bókin Orðabókin, er ein bók við samrøðunum, úr útvarpssendingini, ið eisini var nevnd Orðabókin. Hon kom út 20.juni 2009, í samband við 75 ára føðingardag hansara.

Mest kendu nýyrði hann er komin við eru:

• Telda av tal og telva
• Tyrla fyri helikoptari av tyril
• Fløga fyri CD av sama orði fyri tjúkka flís
• Flogbóltur fyri volleyball

Keldur

• Jóhan Hendrik Winther Poulsen,samrøða við Bergtóru Jensdóttir
• "Mál í Mæti" og
• "Orðabókin"