Celsiusstigin

Hitamálari −50 °C til +50 °C.

Celsiusstigin verður nýttur í flest øllum londum í heiminum. Nøkur fá lond eru kortin enn, sum brúka Fahrenheitstigan. Til vísindalig endamál verður hiti máldur í kelvin.

Hiti ella temperaturur er mál fyri, hvussu heitt okkurt er. Hiti, sum er givin upp í °C, er máldur eftir Celsiusstiganum. Vatn frystir við 0 °C og kókar við 100 °C, tá trýstið er 1 atmosfera.

Stigin er nevndur eftir svenska vísindamanninum Anders Celsius. Celsius setti frystipunktið á vatni til 100 stig og kókipunktið til 0 stig. Landsmaður hansara, Carl von Linné, broytti stigan til tann, vit kenna í dag.

Stigaumrokning

Soleiðis rokna vit stig Celsius um til kelvin: T_K = T_C + 273,15.

Soleiðis rokna vit kelvin um til stig Celsius: T_C = T_K − 273,15.

Soleiðis rokna vit stig Fahrenheit um til stig Celsius: T_C = (T_F − 32)/1,8.

Soleiðis rokna vit stig Celsius um til stig Fahrenheit: T_F = T_C × 1,8 + 32.

Stigaumroknarar eru eisini á internetinum.