Kingston

Land:	Jamaika
Grundað:	1693
Borgmeistari:	Desmond McKenzie
Vídd:	453 km²
Íbúgvar (2001):	651 880
fyri km²:	1,439/km²
Mál:	Enskt
Tíðarzona:	UTC -5

Kingston, høvuðsstaðurin og týdningarmesti havnabýurin í Jamaika, er ein av størstu býum í Karibia. Bretar grundaðu býin (1693), sum vaks skjótt og gjørdist týðandi útflutningshavn, og haðan var nógv sukur flutt til Evropa. Í 1907 fór býurin illa í jarðskjálvta. Hann varð bygdur upp aftur, og har eru nú nýmótans gistingarhús, bankar og handilshús. Í vestara parti í býnum eru ovfólkaðir fátækrabýlingar. Har er nógvur harðskapur, og javnan er politiskur ófriður ella stríð ímillum drøgghandlarar.

Rastafarilæran tók seg upp ímillum tey fátæku í Kingston í 1930-árunum. Tey, ið taka undir við hesari læru, halda, at Haile Selassie, sum var keisari í Etiopia, var ein gudur. Tey trúgva eisini, at Gud (Jah) skal føra tey aftur til Etiopia, hitt lovaða landið. Rastafarianar eta vanliga ikki svínakjøt, eru ímóti harðskapi og ganga við síðum flættum. Klæði teirra eru mest grøn, gul og reyð, ið eru litirnir í tjóðarmerki Etiopia.

Sí eisini

• Jamaika