Frá Wikipedia, hin frælsa alfrøðin
Sumba er sunnasta bygd í Suðuroy og harvið eisini í Føroyum. Sumba er ein av gomlu bygdunum í Føroyum við fleiri býlingum og var fyrr millum tær størstu í landinum. Ein er býlingurin í Hørg. Úr Sumba eru nógvar sagnir uppskrivaðar, og ein teirra er "Hargabrøðurnir". Hon er um fýra brøður í Hørg, ið vóru tiltiknir fyri styrki. Einaferð ránsmenn úr Írlandi gjørdu innrás í Hvalba, var boð sent um oynna eftir hjálp. Tá kom dirvið og styrkin hjá Hargabrøðrunum væl við, so teir ikki sluppu longur suður á oynna, men vóru riknir aftur til sjós. Kendasta skaldið í Suðuroy, Poul F. Joensen (1898-1970), var ættaður úr Hørg, og hann nevndi seg viðhvørt "Hargaskaldið".
[rætta] Myndasavn
